علمانى كافر

علمانى كافر

واحنا أطفال كانوا بيقولولنا ان العلمانيين واللبراليين دول ناس كفار مابيعبدوش ربنا وشايفين ان الدين مش موجود واصلا مافيش حاجه اسمها إله ، وطبعا اللى زى دول ماينفعش نختلط بيهم او نكلمهم عشان الجدال معاهم مافيش منه فايده وممكن يخلونا نكفر والعياذ بالله ، فكبرت وانا عندى يقين داخلى بإن كل علمانى او ليبرالى هو فى الأصل كافر بيدعو الى التفكر فى الكون دون وجود خالق ، ولما فكرت أسأل هو العلمانى ده بيفكر ازاى ؟ وبيعمل ايه بالظبط ؟

كانت الاجابه :

ان العلمانى لا يعترف بالشريعة وبيدعو للفواحش كالزنا وشرب الخمر ويدعو الى هدم كل ما له علاقه بالدين وبالتالى فهو يسعى فى الارض فساداً 

وبناءً عليه ...  يباح ان يطلق عليه "كافر"

الصراحة انا كنت مصدقاهم ومقتنعه برأيهم خصوصا انهم اساتذتى وأزهريين يعنى مش أى كلام ، لحد ما خرجت للدنيا واختلطت بالناس وعرفت شباب من اللى بيقولوا عليهم استغفر الله العظيم "علمانيين" وشباب تانيين اللهم احفظنا "ليبراليين"

قربت منهم وفهمت طريقة تفكيرهم وهمه عاوزين ايه .. وقتها بس اكتشفت انى كنت حماره .. ايوه مالهاش لفظ تانى غير كده (حماااااره)

بدأت أبحث واقرأ عنهم وعن أفكارهم .. وحتى دى طلعت حماره فيها .. لأنى اكتشفت بالاحتكاك معاهم ان الليبراليه بتختلف من بلد للتانيه وان المعتقدات بتاعة أهل كل منطقه بتأثر عليها .. يعنى مش موجوده فى مصر بالشكل الموجود فى الكتب

هنا بيطلقوا على الليبراليين (ليبرالى محافظ)

وبالمثل العلمانيه كمان

والأدهى من كده والأغرب .. هو تعريف العلمانيه نفسه ( زى ما موجود على موقع ويكيبيديا)

العلمانية : تعني اصطلاحاً فصل المؤسسات الدينية عن السلطة السياسية، وقد تعني أيضاً عدم قيام الحكومة أو الدولة بإجبار أي أحد على اعتناق وتبني معتقد أو دين أو تقليد معين لأسباب ذاتية غير موضوعية،. كما تكفل الحق في عدم اعتناق دين معيّن وعدم تبني دين معيّن كدين رسمي للدولة. وبمعنى عام فإن هذا المصطلح يشير إلى الرأي القائل بأن الأنشطة البشرية والقرارات وخصوصًا السياسية منها يجب أن تكون غير خاضعة لتأثير المؤسسات الدينية

اقولك حاجه صادمه !

انا شايفه ان العلمانية بالمعنى ده ...

هى وجه من أوجه الإسلام ...

طيب فكر معايا بالراحه من غير شتيمه ..

الاسلام بيدعو لحرية اعتناق الأديان ومابيجبرش حد على الدخول فيه ، حتى مسألة ان الدين ما بيدخلش فى السياسه فدى نفسها طبقها سيدنا عمر لما ألغى حد السرقة لأنه شاف ان فى مجاعه فى البلد .. هل هو كده بقى كافر ؟

اضافة ان السياسة داخليا وخارجيا ولامؤاخذه ليها أساليبها اللى مش نضيفة وكلنا عارفين .. تفتكر بقى ندخل الدين فيها عشان يبقى مرمطه ؟ ورجل الدين كمان مش هيبقاله مصداقية عندى ماهو رجل سياسى بيطبل للنظام او بيشتم فيه .. يعنى خرج من دوره الدعوى اللى بيقرب الناس فيه لربنا ودخل فى دور تانى ابن ستين كلب عدم اللا مؤاخذه .. (وأطن اننا شوفنا ده بيحصل فعلا الايام اللى فاتت )

اللى عاوزه أقوله ان انا كمان شايفه ان الدين أصلا مفصول بطبعه عن السياسه لأنه منزه عن أى دنس .. وان علاقتى بربنا ده شئ بينى وبينه وماحدش يقدر يفرض عليا  حاجه بإسم الدين .. 

عاوز تعمل حاجه اعملها .. انت المسؤل الوحيد عن نفسك قدام ربنا وماحدش ليه انه يفرض عليك حاجه أصله مش هيتحاسب بدالك

هايدى الشافعى